Schön, dass Du bi üs bisch, entweder no nid würklech ganz gange oder z’früeh ume cho. Ou wenn ig muess gestah, irgendwie isch es scho chli schreg Dis Ufträte, aber mängisch isch ou süscht aues chli verdräiht, jetzt bisch jedefaus da! Erscht vor zwe Täg, ha nig mir die erschte Schneeflöckli herbi gsehnt, ha das mit em Summer mau scho wieder gseh für hür, und schiinbar isch mi Wunsch subito umgsetzt worde! Und natürlech fröi ig mi wahnsinnig über die chüeleri Luft und ä herrlech agnähmi Nacht!

Ig weiss, Du bisch sehr luunisch, mau schön, de ir nächschte Stung es Gwitter. Konstanz isch nid so Dis Ding. Das macht Di ja ou us und drum so ungloublech spannend. Aber, tatsächlech chunnt da jetzt es aber, wenn Du scho Zmitts im Summer unerwartet Dini Luune chunnsch cho usläbe, wärs ächt da viellecht müglech, die Wächsle vo brätschheiss zu chaut, dass me z’Gfüeuh het me verfrüürt schier, über Nacht z’mache? Es isch tatsächlech nid so luschtig, wenn me am Morge bi auerschönschtem Wätter, nachere z‘warme Nacht z’Huus verlaht, im Jupe und churzermlig, und am Abe bim Heiloufe z’Gfüeuh het, d’Zäihe i de Sandale sige grad wie wenn me frürrend ire Ischwang steit und wartet, dass me sech darf ushänke und zum nächschte Tritt ufstiege, quasi abgfrorre toub auso. Wenigschtens ganz weni, chönntsch Dir id Charte lah luege und ä Tagesverlouf eifach chli mit Sunne und Gwitter dürenang bringe und das mit de Temperaturschöck uf d’Nächt vertage, so dass me nid mit em ganze Chleiderrepertoir muess use gah nume, dass me für aui Fäu gwappnet wär. A Rägeschirm z’dänke längt da fürig!